Прадпрымальнікі Гародні плануюць правесці мітынг

Прадпрымальнікі Гародні плануюць правесці мітынг 25 сакавіка, а таксама чакаюць, што ў мітынгу возьмуць удзел актывісты палітычных сілаў. Пра гэта паведаміў БелаПАН лідэр стачачнага камітэту прадпрымальнікаў Валеры Леванеўскі. “27 лютага была дасягнутая дамоўленасць наконт удзелу ў акцыі з прадпрымальнікамі Аб’яднанай грамадзянскай партыі, а 26 лютага – з паплечнікамі Аляксандра Мілінкевіча”, – сказаў В.Леванеўскі.

Па яго словах, 2 сакавіка плануюць канчаткова ўзгадніць усе пытанні па арганізацыі мітынгу, пасля чаго ў гарвыканкам будзе пададзеная адпаведная заяўка.

“Гарадзенскія прадпрымальнікі – вельмі актыўныя людзі. І таму на мітынгу лозунгі будуць не толькі і не столькі ў абарону правоў прадпрымальнікаў, колькі ў падтрымку дэмакратыі, свабоды слова і свабоды сходаў у Беларусі. Але і сацыяльныя праблемы мы таксама збіраемся падняць падчас акцыі – у прыватнасці, падвышэнне камунальных плацяжоў”, – сказаў Леванеўскі. Па яго словах, удзел у акцыі плануе ўзяць большасць гарадзенскіх прадпрымальнікаў.

“Мы нават правялі анкетаванне прадпрымальнікаў на рынках горада – больш як 60% прадпрымальнікаў выказаліся за правядзенне мітынгу”, – сказаў лідэр стачкаму.